Desde o pasado venres 1 de abril, a coñecida praia da Menduiña, en Aldán, acolle o primeiro Green Bar de Galicia do Fogar do Santiso, a firma galega de referencia da gastronomía sostible. Á beira da praia e con vistas á ría de Aldán, o novo restaurante Fogar do Santiso pretende consolidar o seu concepto no Morrazo, poñendo en valor os oficios do mar e a cultura mariñeira a través da comida ecolóxica e a coctelería. O propietario do Fogar do Santiso, Jose Santiso, levaba tempo intentando instalarse nesta zona co obxectivo de “pechar o circuíto do mar”, xunto co restaurante que abriron en Lapamán o pasado verán.
Aproveitando o espazo de terraza que ofrece o novo establecemento, estrean unha carta de cócteis elaborada con bebidas ecolóxicas e produtos de tempada, locais e de quilómetro cero como algas ou herbas aromáticas da costa. Da man de Diego Mosquera, Premio Nacional de Coctelería, ofrecen diferentes tipos de cócteles con lima do Rosal, amorodos ecolóxicos, xarope de canela, escuma de algas Codium ou loureiro da horta, por un prezo de entre sete e oito euros.
En canto á gastronomía, o novo restaurante ecolóxico do Morrazo aposta polos sabores do mar e da tempada con pratos elaborados a partir de produtos vencellados aos mercados de Aldán, Bueu e Cangas, verduras das súas propias hortas e carnes da montaña de Ourense.
