Ao redor de quince mozos galegos desempregados comezaron esta semana a súa formación práctica no Fogar do Santiso, no concello de Teo, dentro dun programa formativo que o establecemento desenvolve xunto a DELOA e a Escola de Organización Industrial. Mozos, entre 16 e 30 anos, están a aprender a xestionar a agricultura ecolóxica, a transformación e a restauración de alimentos para favorecer a súa empregabilidade e favorecer a súa inserción laboral.
O Fogar do Santiso conta con 10 hectáreas de horta ecolóxica en Teo, ademais dun centro de transformación e restauración con residuos cero. “Queremos pechar círculos”, explica Jose Santiso, copropietario do Fogar do Santiso. “Proporcionamos os espazos, as infraestruturas e os equipamentos para a aprendizaxe. Estamos encantados de crear redes de colaboración con DELOA, a Escola de Organización Industrial e con mozos que buscan un emprego digno no rural”, engade.
A Asociación de Desenvolvemento Local DELOA, entidade sen ánimo de lucro, coordina o programa de formación, que terá unha duración de dous meses. Pola súa banda, a Escola de Organización Industrial (EOI) encargouse da selección do profesorado externo para o programa de formación, dentro do proxecto ‘Millenials’.
