As follas de limón da exclusiva xenebra que a empresa O Fogar de Santiso presenta esta fin de semana na Feira Biocultura da Coruña proceden da maior plantación de cítricos ecolóxicos de Galicia. Trátase da explotación de Óscar Álvarez, pioneiro no sector na horta do Miñoto que comezou a plantar en 2016 e que xa conta con máis de 2.000 árbores en produción.
“É, sen dúbida, a xenebra ecolóxica con máis contido cítrico de Galicia. É unha edición especial do Green Mixology Organic London Dry que lanzamos o ano pasado”, explica José Santiso, propietario de O Fogar de Santiso. Desde 2017 foi a primeira empresa de España especializada exclusivamente en destilados ecolóxicos. O seu Green Mixology Organic London Dry, que tamén utiliza follas frescas de limón entre os seus botánicos, foi un dos produtos elixidos pola multinacional Inditex para incluír na súa cesta o pasado Nadal e por El Corte Inglés.
